Gipuzkoako itsas ondarea, zahartze aktiboa sustatzeko topaketa fisikoen eta birtualen eremu

BITXIKERIAK: ondarea hurbilduz deritzon proiektuaren testuinguruan, Mundubira adineko herritarrei zuzendutako proiektua da, bizitzan zeharreko ikaskuntza erabiltzen duena zahartze aktiboa sustatzeko estrategia gisa. Begi Bistan turismo jasangarriko enpresak, Elkano Fundazioarekin eta Oniversityrekin lankidetzan, 55 urtetik gorakoentzako formatu berri bat proposatzen du, aintzat hartuta Gipuzkoako itsas‑ eta arrantza‑ondarea, munduaren lehen birarekin amaitu zen Magallanes‑Elkano espedizioaren 500. urteurrenaren testuinguruan. Programa honako hauek osatzen dute: prestakuntza birtuala, Study Tour bat (ikasketa‑bidaia) eta itsasoari lotutako Gipuzkoako udalerrietara egingo diren bisita gidatuak. Gipuzkoako Foru Aldundiak proiektu hori aukeratu du Adinberri 2020 deialdian.

Ekimena gaur goizean aurkeztu dute Donostiako Euskal Itsas Museoan ADINBERRIKO Ainhoa Becerra, Begi Bistan enpresako kudeatzaileetako bat den Naiara Malavék, Elkano Fundazioaren proiektu‑koordinatzaile Rafael Zulaikak eta nagusi aktiboentzako Oniversity online unibertsitateko zuzendari Olga Riverak.

Proiektuaren xedea da 55 urtetik gorako pertsonen arteko sareak egitea, bai modu birtualean, bai aurrez aurre. “Kolektiboak elkarreraginean jardun dezala da gure asmoa, eta ikasteko inguruneak sortzen ditugu, bizitzarako gaitasunak garatu eta sustatze aldera, alfabetatze digitalaren aldeko apustua eginez. Ingurune horietan sortutako giroan eraikitzen diren harreman‑sareek bakardadea urruntzea dute helburu”, azaldu du Begi Bistan enpresako arduradun Naiara Malavek. “Zati bat online denez, proiektuak aukera ematen digu Interneterako sarbidea duen munduko edozein lekuko pertsonekin konektatzeko. Study Tour osagarriarekin eta bisita gidatuekin, mundu birtual hori benetako ekintzetan gorpuzten da. Bi gauza horien arteko konbinazioa zirraragarria ere izan daiteke, eta bidaide berriekin gure ingurua eta historia berriz aurkitzeko abagunea eskaintzen du. 

Mundubira: online prestakuntza eta ikasketa‑bisitak

Proiektuak online ikastaro bat, Study Tour bat eta eguneko bisita gidatuak biltzen ditu. Ekintzak bakoitza bere aldetik edo modu konbinatuan egin ahalko dira.

“Elkanoren lehen zirkumnabigazioa: euskaldunak mundu modernoaren hastapenetan” izeneko online ikastaroa apirilaren 14an hasiko da, eta zuzeneko 90 minutuko 9 saio izango ditu, asteazkenero, 17:30etik 19:00etara, ekainaren 9ra arte. Ikastaroak Elkanoren lehen zirkumnabigazioari lotutako hainbat gai jorratuko ditu, eta, euskaldunek bidaian izandako parte‑hartzea eta antolaketa aztertzeaz gain, bidaia bera ere ikertuko da aurkikuntza gisa eta erronka teknologiko gisa. Halaber, duela 500 urte mundua konektatu zuen lehen bidaia horren osteko testuinguruaren gainean hausnartuko da. Bederatzi gai horien inguruko adituak gonbidatuko dira, besteak beste: Álvaro Aragón (UPV‑EHUko Historia doktorea), Amaia Rojo (UPV‑EHUko ikertzailea), Paco Toledo (Sevillako Unibertsitateko esperientzia‑gelako kudeatzailea), Daniel Zulaika (Elkano Fundazioaren aholkularitza‑batzordeko kidea), Nelson Aguilera (Txileko antropologoa), Xabier Alberdi (Historia doktorea eta Euskal Itsas Museoaren zuzendaria), Guillermo Roa (Elhuyar Fundazioko kidea), Carlos Ciriza (Nafarroako Unibertsitateko kidea) eta Jose Mari Larramendi (antropologoa eta Elkano Fundazioko aholkularitza‑batzordeko kidea).

Ikastaro honen ostean, Gipuzkoan zehar Study Tour bat egiteko aukera izango da, ekainaren 21etik 24ra, eta 27ra arte ere luzatzeko aukera izango da. Proiektuaren parte horretan, partaideak Mutrikutik Hondarribira joango dira Gipuzkoako kostalde osoan zehar. Bidean, lurralde horretako itsas eta arrantza‑ondarearen toki esanguratsuenak bisitatuko dituzte; esate baterako, Zumaiako arrantzaleen kofradia zaharra edo zaharberritu berri den Orioko Mutiozabal erriberako ontziola. 

Programaren hirugarren oinarria eguneko txangoak izango dira, eta dagoeneko, aktibo daude. Kasu honetan, bisitak hilabete bakoitzeko lehen eta hirugarren astean egitea proposatu da; horietako bakoitzean, herri bat bisitatuko da: Mutriku, Deba, Zumaia, Getaria edo Orio.

Ekintzei, datei eta prezioei buruzko informazio zehatzagoa online eskuratu daiteke honako helbide honetan: www.begi‑bistan.com/mundubira.